مين أنا؟

أنا ديما… ومن هون بلّشت حكاية Thinkydoo!

كم مرة، كأخصائي أو أخصائية نطق ولغة، كان الهدف العلاجي واضح ببالك… بس الأداة المناسبة مش موجودة؟

تبحث عن الصور، وتنسخ، وتطبع، وتقص، وترتّب. ساعات من التحضير حتى تصنع نشاطًا يخدم هدفك، ويجذب الطفل، ويطلع بالشكل اللي تخيّلته.

وكأهل، كم مرة بحثتوا عن أنشطة عربية مفيدة تشاركوا فيها طفلكم؟ بتشوفوا انجذابه للشاشة، وبتتمنّوا تستثمروا هالاهتمام بوقت فيه تفاعل وتعلّم، وتكونوا إنتوا جزءًا منه.

ويمكن خلال انتظاركم لموعد في مركز تطوّر الطفل، كان السؤال يتكرّر: «شو بنقدر نعمل معه بهالفترة؟ ومن وين نبلّش؟»

من قلب هاي الأسئلة، طلعت فكرة Thinkydoo.

أنا ديما، أخصائية نطق ولغة، حاصلة على بكالوريوس علاج النطق والسمع من جامعة بيرزيت، وماجستير إرشاد الطفولة المبكرة من الجامعة العبرية، برسالة تناولت الارتباط العاطفي لدى الأطفال ذوي التوحّد.

خلال أكثر من عشر سنوات من العمل مع الأطفال وعائلاتهم، تعلّمت أن وراء النشاط الناجح هدفًا واضحًا، ومعرفة بقدرات الطفل، وطريقة لعب تشجّعه يشارك ويحاول ويعبّر بطريقته.

أسّست Thinkydoo لأحوّل خبرتي إلى أدوات علاجية عربية تفاعلية جاهزة؛ توفّر على المعالج وقت التحضير وجهده، وتمنح الأهل أفكارًا يشاركوا فيها أطفالهم التعلّم في البيت.

ألعاب جذّابة ومتدرّجة، صُمّمت مع مراعاة التسلسل التطوّري لاكتساب مهارات النطق واللغة، لتخدم أهدافًا واضحة وتترك مساحة لاختلاف قدرات الأطفال واهتماماتهم.

هيك بتخيّل Thinkydoo: فكرة تخدم المعالج، وفرصة تقرّب الأهل من طفلهم، ولعبة تفتح بابًا لمهارة جديدة.

لأن وراء كل لعبة فكرة… ووراء Thinkydoo خبرة وحبّ للّعب!